حب الناس

إنتـــ ترد ف أيها وقت ..
وبراحتك
منين ما يطاوعك المعنى
وباب الحرف يفــتحلك
وترتاحلك
ساعات البوح
وسيبك يا جدع سيبك
من النابح
ومـــ المنبوح
وصفى الروح
تشوف أكتر
قواله الخلق ف الباطل
غبار خانق
مغمق لمعة الأخضر
لا حرفك واحدة هيشيله
ولا حرفى الحـــــــزين ..
يقـــــــــــدر
فعبّر بس عن جوعك

وحُـب الناس
وفكر بس ف دموعك

على اللى مات

من الإحساس
هتشعر إن موجوعك
ضمير عايش
وبتحبك
عشانه الناس
وبتحبك عشانه الناس

ولسة ياما هـنّْـعكِــش

ولسة ياما هـنّْـعكِــش
بحرف الكلمة ع المضمون
ندوس ع الآه وما يهمش
يكون مايكون
جميل الشعر لو عاقل
ولو مجنون
جميل أكتر
لأنة بمجملة أحلام
مسيرها ف يوم هتتفسر
جميل الحرف لو باحث
على نفسة
بيكتب نبضة سطر بسطر
ويحكــــــى
إللى بيحسُــه
وبيصـــــور
رؤاه بوضوح
جميل المعنى لما يكون
بقلب وروح وشفافية
كيـــــــان شاعر

من أول السطر ...

من أول السطر ...
إللى أدمن دمعيات الحرف
وضجيج خطوته
وعند أخرنقطه شيبت الكلام
لسانى بعشق ضمته
وبحس جداً كسرته
وسكونه فى لحظة ملام
ولسه فيّا يا صبيه
ألف مليون ألف صوت
مشتهى طعم الغُنــــــا
أما موتى ..
ف السكوت

وما يهمش

منيش خايف

وما يهمش

نقضيها دموع ف دموع

مادام الجوع ف أوصالنا

كدا .. بينهش

كما المفجوع

وصار الشوك

قوى مشبوك ف جوارحنا

لابد حروفنا هتسررررخ

ف وش اللى سلب

أجمل ملامحنا

يجوز حرف إتكتب م القلب

يكون وقت الضرورة شموع

نوبة بكــــــــــــــاء

كنت وما زلت على يقين بأن الدمعة تثمر

وأن نوبات البكاء أمر ضرورى كنوبات رى شراقى الارض

تمنحها حياة من جديد

فأغلب ظنى ان شراقى الانسان أشد حاجة لماء خصوصيته الملح

وفى كلتا الحالتين تعود السكينة من جديد إلى الارض بعد نوبات الرى

وكذا إلى العين بعد نوبات البكاء لتثمر الأرض خيراً وتثمر العين ضوئاً

مع الفارق فى نسب الأخذ والعطاء وهذا فى رأيى لا يهم

فقد علمنى الحزن أن أمتطى صهوة الوجع مدججا بالصحو

وأعيد قراءة تاريخ أوجاع الانسان فى دفتر صفحات العمر

لأجدنى اكثر الناس حظا بزيارة هذا الوافد المعقّمْ الجرىء

الذى يأتى لاجراء أدق جراحة بالقلب ليعيد دوزنة أوتار الانسانيه فيه

حتى تصبح اكثر استشعارا ورقه

وللجراحة أثارها الجانبيه طالت ام قصرت مدتها

علينا تحملها بجلد ومثابرة

كما إنه علينا دفع الفيزيتا كاملة وعن طيب خاطر !!!

أول سطر الآه...

شفتى إمبارح ماتش الأهلى
شفتى الماتش ؟
والواد صاصا ..
قالى يا بابا
الأبلة مجتش
والجورنال زعلان على حالى
قلت ف بالى ..
متعبطش
فكك بقى يا أميرة السيرة
وخدى حرفينى
من غير زق
أول سطر الآه كتبتنا
وأخــــر سطر
( ومابينهم بالظبط حياة )
مقدرناش على لاء
ف الأول
ومّــــا كبرنا
عرفنا الآه

الانثى أجمل مخلوقات الله وأغلاها

للعذارى سمت شديد البياض
حرى بنا أن نعتنى بة كما نعتنى بأجمل وأثمن ما نملك
قدر شاق
ولكنه نفس القدر التى تحملتة بحب وطواعية العذراء مريم
لتصبح أما لاحد أنبياء أولى العزم و مضرب المثل فى الطهر
حتى القدر التى تلاقية عذراء الحشرات تمهيداً لدورة حياة جديدة
فى لقطة تستحق المزيد من التأمل
فكم من آلام الصمت تسحقها وهى تركن للإعتكاف عن طيب خاطر
حتى تستمر منظومة البقاء
حمل ثقيل
وقدر أصطفى بة الله عز وجل الانثى أجمل مخلوقاتة وأغلاها

مش عارف مين طفى النور

إيه الحاصل هنا بالظبط

انا يا خونا يادوبك روحت

اشترى طابع بوسته وجى

بينى وبينكم تهت ودوخت

أغمن خالص يعنى علىّ

أصلى لقيت ف السكه زحام

إشى طوابير علشان العيش

ومتاهه وخناقات وكلام

والبنزين شاحح ومفيش

غير بس السوبر يا همام

والحضرى الهاربان م الجيش

تعطيش ف وسائل إعلام

والاسعار آل طاشت طيش

ولا حدش بسببها مُلام

واللى خنقنى وحير فكرى

دا التهميش

للحاصل لخواتنا ف غزة

ولما سألت يا ناس ع العِزه

قالوا خلاص

بيفرقوا على روحها خلاص

رحمه ونور

هُب لقيت الكون حواليا

يا ناس بيدور

مش عارف مين طفى النور

مش عارف مين طفى النور

عروسة البحر

ومن صغرى

بحب البحر وعروستة

طراوته

وضحكيات موّجُه

دفا قلبى بشموسته

ومن صغرى بحب اسمع غُناه للصبح

وفرح الفرح لو هلت ..

عروسة البحر

ياخدنى السحر ف ضياها

وتكمل فيا ضحكايتى

أدوب مع نفسى جواها

عروسة البحر دى حكايتى اللى غاوية الصعب

يا نبض القلب ..

إيه مالك؟

بتعشق فيها موالك

وتكتبها امل موعود

وشمعة ليلك الحالك

ولما كبرت حبة كمان

بقيت أسمعها لحن حزين

ف شهقة ناى

و عزف كمان

وفية واصل ما بين البين

عروسة البحر جنيه

وانا انسان

بحب ألقاها فى صبيه امان وحنان

ولو دار الزمان بيا

ف أى مكان

بتفضل نبض غنيوتى

عروسة البحر

عصام علم الدين

كلامك ياد يا عصومه
شقى شقاوة
بجد بحسه من قلب انفطم ع الصدق
وعاش العمر بيدور على الاحلام
يجوزإنه صحيح بالزق
لكن عايش
بيعرف إمتى قولة آه
وإمتى الأ
بدون ما يساوم المعنى
ولا يسأل ..
هتاخد إيه ؟
وتدفع كام ؟
كلامك يا بن خالى تمام
فإسمحلى
بقى بالعصر
عشان حبة شراب منك
تخفف م الوجع ياما
كحبات الندى ف الفجر
أقولكشى من الاول يا عصومه
جميل حرفك
بيبرق زى سبحة يُسر

آهين يا دم الحرف

آهين يا دم الحرف
لما بترتجف جوه الوريد
آه يا متاهه اتبعترت فيكى الآمال
إيه الجديد؟
لسه السؤال ..
عمال يلفلف ع اللى ضايع
مش لاقيه
وف كل مره يحس مر
يمرره على ألف تيه
وبرضه ..
بيّدور عليه !
لساك برىء
ياحلم ويّـا الفجر طل
رسمت خطاوى سكته ضحة وليد
لساه عنيد
كل اللى يقدر يحتوى لطشة وجع
أكيد أكيد
لساه بطل

ألم الجرح

لأ مش عايز
أشغل روحى بأى بصيص
ألم الجرح أهوّن بكتير
من تخدير دم الأحاسيس
لأ مش عايز
واوعى يا نبضة قلب الحرف
توهبى سِرك
أى خسيس

من كتر أوجاع الحروف / نزف الكلام
شرشر على جدار الحقايق شكوته
مين فين بالظبط الملام ؟
يا وكسته
إللى ضرب لخمه وصرّح بالآهات
وإللى لسان كدبه بيطول كل يوم ..
عشرين قيراط ..
دى لذيذة خالص كلمته
هتصدقى لو قلتلك
فيه الف شىء جوانا مات
دارى وجيعتك يا صبيه
ولملمى توب الحروف
قدامنا مليون ألف خوف
محتاج لكلمة حق / تبرق كالشهاب
تقدر تنور للى تايه سكته

كلام ف الجون

كلام ف الجون
ورغم نجيلة الترتان
وجمهورنا اللى مش .. دريان
بيرجف شبكة الاحساس
حنين الفكرة للمضمون
وكان لازم
يا معنى بيستهجى الحلم ..
مش راضى
عشان راضى
يعيش العيشه
وبفطرة : بداية الكون
ودا بالطبع مش لازم
ولا مأمون

شتات

وبالكربون
طبَّع حِبر الوفا بالصدق
حكاية جرح مش بالمره إنسانى
وأه يا جدر احزانى
بتعشق غِوّط غِوّط الصمت
تتلذذ بكتمانى
برغم إن الحروف واجعه
بتعلن إن
حمام البن
مش راجع
ولا رجعه
فإفرح يا جفا وهيّص
وافرد فينا دراعاتك
وضلم كل ايامنا
بطلة شوم ف قسماتك
وعيّشنا كما الاموات

تشكيك

التشكيك تشكيل سيريالى
خلطه إحساس ميه الميه
محض جنون ..

وأهو جه على بالى
سيريل لوغاريتمات عصريه
يفضل حاير نبض سؤالى
مش تخاريف ..
على قد ما هيّا ..
رحلة قلب مغامر جدا
فى المساحات الغير مرئيه

هانى رمضان

إنت يا ماسك ناى الغربه ..
وهات يا عياط
بس يا عم
يا شارب هم
وبتجلدنا
بأقسى سياط
هتصدقنى لما هقولها ؟
ولا هترفع حاجب قلبك
وبدمعاتك تصرخ فيا :
إلعب غيرها
بس يا عم
لو فيه واحد بيك مهموم
فيه ملايين معدومى الدم
آسف آسف
أجدع حاجه
تعمل نفسك مش مهتم
أوتر قلبل الفجر بساعه
واسجد
وإدعى
قادر ربك
ف جزىء لحظه
يزيح الهم

نِــدعات دفـــــا

(1)

لما دى يا دوب يا دوب
ندعة دفا
يبقى يا بحر الحنان
يا ابتسامات الصفا
شكله إيه مكنون كنوزك
قلبى سِكنك ..
وأكتفى
أصله حس آمان آمانه
حس خالص بالشِفا
من يادوب يا دوب يا دوب
نِـدعة دفا

(2)

ندعة دفا
متلفلفه بحبة حنين
نزلت على فرعين صُغار
كانو يا عينى دبلانين
دبت ف اوصالهم حياة
آهين وأه
صعبه الحياه من غير دفا

(3)

ندعات دفا
من قلب انسانى بجد
رقت معاها الاغنيات
هدت حيطان التلج هد
واتشعبطت ويا النسيم
بقى زيها
دابت ملامحه ف سحرها
وحس رقة نبضته
من قلبها
المليان دفا

(4)

نِـدعة دفا
سقت عطش ايام عجاف
وف لحظه لملمنى الهوى
حسيت ساعتها بإرتجاف
قلبى الصغير كان بيرقص م الفرح
وكأن عمره ما إنجرح
ولاحتى خاف

(5)

نِـدعة دفا
أخدتنى على شط الصحاب
حسيت معاها بالآمان
ونسيت قساوة لغتراب
وف لحظه بدر الود بان
طبطب على قلوبنا الوفا
فتّح ترابيس البيبان
من بس ندعاية دفا

(6)

ندعة دفا
لفت عبيرها ف وشوشات
هزت فروع احساسى
على همس النايات
والنسميات
طرحت ثمارها المدهشه
بلون الصفا
من بس ندعاية دفا

(7)

أه م الدفا
لما يكون شمعة فرح
وقت إنهزام قلب الضيا
تقدر تقيد
آه م الدفا
والزقزقه
والرفرفه
بجناح حروف المعنى
وبإحساس فريد
تروى عطش
حبة مشاعر مرهفه
ندعات دفا

صلوا على الحبيب

صلاتى عليك وتسليمى يا ابو الزهراء

وشوقى إليك مخلينى احس محبتك ترياق

يا أروع قلب مش شاعر بنفسه وبس

وأحزانه عشان الأمه يشملها رضا الخلاق

من روائع مظفر النواب

أُحاور روحي أحاورها..

وكل حوار مع الروح ماء

بكى طائر العمر في قفصي

مذ رأى مخلب الموت

ينزل في صحبه

ويَكُفّ الغناء

مــتى ؟؟

أيهذي العروسُ

يجـــــــيء

الزمـــان

الصـفـــاءُ

ف عز الليل

ف عِز الليل

قمر سهران

ونجم يوشوش النسمات

وأنا وهيا :

بنتسامر

تاخدنا اللحظه ف مداها

على جناح الهوا

نســـــــــافر

ما نشعر قد إيه م الوقت

عدا وفات

ف ليلة لكتمال الله

عقود الضى

شىء ساحر

نخبى حلمنا فيها

فتتبسم

بطيب خاطر

ويحللنا الـــقا ديماً

ف عز الليل